الكاتب : ابوناصرالعضيب
الله الرحمن الرحيم
كان (سويلم) (مسرورا )هذا اليوم فقد انهى اصلاح ماكينته (اللستر)_التي (جيمت)_
قبل يومين وعاد الماء يجري على استحياء عبر الجديولات المليئة بالاعشاب الى النخيلات التي ملت من معانقة السماء بعد ان قل مدد الارض لها من الماء الذي اغتصبته منها الأعشاب ...
كانت هذه (العيدان) هي ما ورثه (سويلم) من ابيه (عبيّد) المشهور (بقتيل الصدق)!!
الذي لايمل من سرد قصة (ابوه)(وليذهب سيبويه الى الجحيم!!) على وضيوفه ومضيفيه ...
..عنما ازال شماغه وطاقيته عن راسة الصغير الذي تحمله رقبة ضاقت عن استضافة حنجرته وعروقه البارزه في كل
اطرافه بشكل لافت وكثيرا ماكان يرد - مازحا-على المستغرب بأن (تسبيك خارجي!)...
..يرحب بإبنه الذي جاء بالقهوة بعد عصر كالعادة ..يربت على كتفه بابتسامة - قلما يراها – قائلا:
_ هلا بأبو سويلم ! عساك تصير مثل جدك !!
_ وش كان جدي؟! وشلون مات؟؟
يأخذ رشفة من فنجان قهوته ويعدل من وضع اريكته المحشوة بالتبن ...
_قتلوه (الاخوان)
_منهم الاخوان؟
هذولا ناس اطلعوا عقب مافتح الملك عبد العزيز الرياض وبعض نجد.
فتح لهم المضايف بثليم ودخنه وبناء لهم الهجر وفتح لهم المساجد ودرسوهم كتاب التوحيد والاصول الثلاثة للشيخ محمد بن عبد الوهاب وتعاطفوا وتعاونوا معهم باقي الناس من اهل القرى والمشايخ ودعموهم وساعدوهم ...
وكان الشريف بمكة والحجاز واعلن عن الثوره العربيه ضد الاتراك بمساعدت الانقليز اللي اغروه بحكم ديار العرب اذا
طرد الاتراك ! واللي عاد( طقعوا) بلحيته !وحجروه بالاردن! هالمهبول يبي الانقليز يدمرون دولة الترك ويقومون بداله
دوله للعرب؟!!
وحارب الاتراك وطردهم من
الحجاز وشمال الجزيرة لين وصل الشام ..
...وقام الامام عبدالعزيز_قدس الله روحه ومن اول يسمى الامام _ واعلن الجهاد ضد الشريف واللي ماكان يبي غير نجد.. وطلب من الاخوان النفير للجهاد لفتح مكه وراحو الاخوان وفتحوا مكة وكل الحجاز الى حدود الشام اللي كان الشريف يسيطر عليه او اللي يسيطرعليه ابن رشيد ...
وكلهم تبع الاتراك لابن رشيد ,ولا الشريف قبل يعلن الثورة العربية على الترك ....يقاطعه ابنه بلهفه
_طيب ومن كان يمد الاخوان ويجهزهم؟
_ الامام عبدالعزيز_الله يرحمه_
_ومن وين له الملك عبدالعزيز؟
_من الزكاة وتبرع الناس !
_ كانوا الناس اغنياء يبه من اول ؟
_ لاولله الافقراء .....ليواصل حديثه وهو يخرج شوكة (قطب*) من رجله التي ملأتها الشقوق الذي
لو اختفى بها (ابن الشيبة او خالد الشيخ)لما وصلت اليه السي آي ايه!!
...وعقب ماانتهوا الاخوان قام عليهم عبد العزيز وكتلهم بالسبلة وبعضهم واللي بقى منهم ولا حاربوه قامت عليهم الانقليز سنة (القلاله)وبعضهم يسميها سنة (الحرث)ليقاطعه ابنه
_ وشي سنة الحرث؟؟
_هذولا قسم من الاخوان طًلب من اميرهم الحربي ان فيه مشركين بالمكان الفلاني خلهم يروحون يحاربونهم
وارسلهم اميرهم للمكان...
ويوم صاروا بخلا خالي لاشجره ولا حجره جتهم طيارات الانقليز وامطرتهم بقنابل كبر القلال* الى طاحت
على الارض خلته تقل محروثه ومحتهم عن الارض وهم مايعرفون الاخوان الطيارات والقنابل وسموه عام (القلال) وبعضهم يسمونه سنة الحرث...
...و بعضهم رجع لدياره وقاموا يسوون السوايا بالناس ويعيثون بالارض فساد باسم الدين ونشر الدين !
..وكان جدك بهالسنه رايح للحج هو ورفيق له ولقوهم بالطريق وسالوا جدك اول..
من ربك؟ وش دينك؟ ومنهو نبيك؟..وجاوبهم جدك ثم اسألوه كم اركان الاسلام ولا عرف جدك عددهن!! والتفت على رفيقه ؟؟واشار بيده خفيه وفرد اصابعه الخمسة قالهم جدك خمسين!!
فمدوه على الارض وقاموا يضربونه ورفيقه يشر له بيده وهم مايشوفون بس هالمره جمع اصابعه الخمس وقام يهزه !!
وصاح عليهم جدك .. خلاص خلاص.. اعرفه اعرفه... قالوا له كم
قالهم خمس ميه!!
فاعادوا الجلد حتى غمي عليه وعند ماراحوا وقام رفيقه يرش عليه الماء ويعالجه حتى وعى قال له ياعبيد
اشرلك انهن خمسه الله يهديك وتقول خمس ميه قال له وهو يتململ من الوجع ...مارضوا بخمس ميه تبيهم
يرضون بخمسه !!الضرب حاصل حاصل والله لو قلت لهم اركان الاسلام خمسة الاف !!
...ويوم وصل مكه هو ورفيقه وخلص من السعي بالمروه وبغى يحلق راح (للعبد) اللي يحلق ...
سأله العبد
وش مزهبك(أي مذهبك)؟ قل له جدك:
طحين وتمر وبقل(اقط)!!
فقال له العبد بزقر وشين نفس ايش مزهبك مزهبك مزهبك ويوم شاف العبد جدك مافهم قاله:
انت صوفي ..؟سلفي..؟ حنفي؟ مالكي ؟كل هذا وجدك مايدري وشي هالمذاهب قال له :
انت رافضي؟!!
قال جدك أي والله رويفض واحب الرفضه..!!!!!!!!!!(والرويفض بلهجت اهل القصيم الساكن الهاديء الذي لايرفض أي طلب )
حلقه حلاقة الرفض !ويوم طلع مع باب المسعى الى والله هذولا الاخوان بعصيهم ومشالحهم
وتناولوه بالعصي يارافضي يالخبيث وتجاهر بالمعصيه بعد!!وجدك مايدري وش السالفه
وقف على الجدار وعطاهم ظهره ورحمه واحد منهم وداه الحلاق وكمل على باقي راسه
خلصو الحج على خيرورجعوا.. ويوم قربوا لديارنا لقوهم بالخلا وتسلطوا على جدك وهو اول ماواجهوه
عجل للرجعه على جدّتَك وعياله!! بس هالمره تعلم كل اسألتهم وخلى رفيقه يقريه كل شيء ويعلمه!
قالوله منين جايين؟
قال حجاج..
قالوا من ربك؟ وش دينك؟!! من نبيك؟!! اركان الاسلام؟ كل هذا وهو يجاوبهم بعرف وثقه!
يوم شافوه يعرف سالوا معكم زاد وماء قالهم جدك لاوالله مامعنا الا الي يوصلنا لاهلنا!!
قل له اميرهم(سعيد)
ابن رشيد كافر والا مسلم؟؟!!
قل جدك لاولله مسلم!
قال اميرهم مدوه!!
وقاموا بضربه اللي بالعصى والي بالحصى واللي بيده واللي برجله لين عوروه وادموه واغمي عليه!!
والتفتوا على رفيقه اللي ابعدوه عنه يوم يسالون جدك!!
وسالوا رفيق جدك من ربك ..............؟؟
ويجاوبهم ...قالوا ابن رشيد كافر والا مسلم
قال الا كافر وبالدرك الاسفل من النار!!
قالوا سلمت ...شال جدك على البعير وهو يخر دمان ومتكسره ظلوعه وجابه لنا وحنا عند البيت
نتحراه لنا اسبوعين انا وجدتك وعمّاتك ويوم قرب انهبلنا وركضنا له ونزلناه وحنا نصيح ونولول
ونشدنا رفيقه وش ببونا؟ وراه؟؟
قال
ذبحه الصزز!!!!(الصدق)
قعد له ايام واستشمت اجروحه(التهبت) ومات الله يغفرله حسبي الله على الاخوان......
_وانتهت القصة كذا يبه ...يعني ماطالبتوا ولا شفتوا من اللي متسبب بوجودهم وتركهم يذبحون
الناس ويفسدون بالارض و و و....؟يقولها كل الم واستغراب ودهشه...عندما قطع جواب والده
صوت الشاحنه (الدنا) المحملة بالرز والسكر والشاي والقهوة والحليب والصلصه والمكرونه
والزيت و....
يفز سويلم لاستقبالهم ليترجل منها ئلاثة اشخاص
السائق وكان نحيفا باسما قد ظهرت شعيرات ذقنه وشعيرات تجمعت في اماكن من خديه (كبذر اعمى)
اما الراكبين(وليذهب الخليل ابن احمد الى الجحيم) فاحدهم ويبدو انه اميرهم ويدعى(مبارك) فكان
قصيرا وبدينا مكتنزا... وان كان سوء التوزيع اصاب بطنه وكتفيه واليته اكثر من غيرها مما زاد بانكشاف
ساقيه واقفا وفخذيه راكعا وقد غطت لحيته اكثر وجهه وباقي رقبته واعلى صدره ...
اما الثالث فكان تناسق هيئته ووسامته انعكست على دماثة خلقه ولطفه وهدوئه...
عانقهم سويلم بكل حرارة وعينه ترمق اكياس(ابوكاس)!
ليعرفوا بانفسهم....
ابو صهيب ...ابوالدحداح..ابو ماعز(مبارك) وهو اميرهم الذي ادرك سويلم منزلته من خلال تقديمهم له
رغم اصراره على التيمن !الذي مايلبث _رغم ممانعته!_ من عدم العمل به...
يأخذ الكل مكانه بالمجلس المتواضع بعد ان قدموا له هدايا كانوا يحملونها معهم وهي عبارة عن
الاصول الثلاثه وشرح كتاب التوحيد وكتيبات عن العقيده والحجاب والغزو الفكري والفضائي والحجاب والعلمانية وقيادة المراة للسيارة !!! ...
يجلس( ابو ماعز) باسترخاء في صدرالليوان (المجلس) (ككوع ريحه) اما الاخرين فكانوا يجلسون بكل ادب واحترام
ليبداء( ابو ماعز) الحديث بعد ان ذكرالمضيف بصدق والده وحسن توحيده وسلامة صدره وطيبته!!ليدخل منها
الى ما لاقاه الامام احمد وفتنت خلق القران مع المعتزلة واخذ يشرح لسويلم خطورة والعلمانية ..وعين سويلم تختلس من خلال الباب الذي ترك مفتوحا كالعادة كيس ابو كاس وكيفية انزاله من هذه العوارض الحديدية المتشابكه!!..وحتى يٌشعر ابوماعز بإنصاته ومتابعته كان يحوقل !ويهز راسه !ويخرج اصوات كدليل على تفاعله كا (الوزغ)
ويعرج على (الاخوان) ومخاطرهم على الاسلام والسيد قطب ..وعندما مرت كلمة (قطب) على مسمع سويلم وكان يفكر بما سيعطونه من هذه الصدقات! قال مقاطعا ابو ماعز :
_هذا خبيث انجس ماخلق الله (وكان يقصد شوكة القطب وهي عشبة تنتج اشواك متعددت الرؤس!)
تفرجت اسارير ابو ماعز عندما علم ان سويلم يعرف (قطب) من خلال شتمه للقطب الشوك!! شجعه على ان يطرح عليه سؤال عن منهجه الذي يسير عليه ليتاكد من عقيدته وسلامتها والتي بموجبها سيتم صرف الصدقة التي أأوتمن عليه وليضمن وصولها الى اصحاب العقيدة الصافية؟!!
ليتفاجاء سويلم بهذا السؤال ليطلب من ابنه بصلف
_ (صب ابوكاس) قاصدا ان يقول له صب للضيف كاس شاي!!
يتوتر بعدها بصمت محرج ادركها ابو ماعز ليقول له
انت( سروري) والا(جامي )؟؟
يصمت برهه ليحدث نفسه
(جامي مجيم من التجييم وقد تذكّر ماكينته التي (جيمت) قبل يومين!! لا ولله ماني جامي !!!
سروري ..السرور زين !!-يحدث نفسه )
_ لاوالله يابو ماعز انا سروري!!
ينهون احتسأهم للقهوة بسرعة بعد ان تغيرت ملامح وجوههم الى الاكفرار والامتعاض!!
ليقوموا بعد ان دعوا له الله باكرامه!!
لينطلقوا بالسيارة وسويلم وابنه خارجا لتوديعهم الذي لم يأبهوا به ليسأل الابن :
_من هم هذولا يبه ؟
_مدري!
_الحكومه ماتعرفهم؟
_مدري
_طيب جدي مايدري وانت ماتدري والدوله ماتدري وانا مادري من يدري؟؟!!
_رح بس حط للغنم هاللي ادوختنا تثغي (تبن )تراه جوعانه !!
_ يعني اذا جاعت ثغت!!
تنهت تنهيتتا عميقة
_يا ويلتي اعجزت ان اكون حتى مثل هذه الانعام !!الله يعين اللي لايثغي ولا يرغي وبطنه فاضي ولسانه مطوي وظهره مزلط وراسه موطي!!
ينهره والده بعد ان سمعه رغم خفوته ليقول
_ارفع راسك انت سعودي غيرك ينقص وانت تزودي!!
طاب باقي يومكم ان كان ثمت وقت في يومكم !!
-----------------------------
رابط الموضوع في منتدى محاور : هنا
ليست هناك تعليقات:
إرسال تعليق